الإبتلاء والتنمر وكلام الناس

الإبتلاء والتنمُر وكلام الناس 

بقلم / نيفين جرجس 

شاهدت مؤخراً منشور من المطرب رامي جمال على صفحته على تويتر قال فيه انه عايز يعتزل الفن بسبب معاملة الناس ليه بعد ماظهر عليه مرض البهاق والناس كانت بتسأله المرض دهه معدي ؟ وفيه بعض من الناس كانت تخاف اصلاً تسلم عليه ،و قال إنه بيحب شغله جدا وهو مصدر رزقه الوحيد ولكن مش عارف يعمل إيه ويخبي إيده إزاي بعد ماظهر عليه مرض البهاق علشان كلام الناس وتساءل : هل أعتزل ولا أعمل ايه . وبعد كتابة هذا البوست شاهدت أيضاً تعاطف كثير من جمهوره معه على وسائل التواصل الإجتماعي  وً دعم نفسي ومعنوي له  من كبار الفنانين  ، وأنا هنا عايزة أسأل : ليه الناس بعدت عن الإنسانية والرحمة علشان تضايق أو تجرح نفسية إنسان بسبب مرض أو إبتلاء خارج عن إرادته وليس له دخل فيه ؟!! والعجيب في مجتمعاتنا أن هناك  قطاع كبير من الذين يدعون الفضيلة والورع والإنسانية يظهرون تعاطفا شكلياً على السوشيال ميديا ولكن بعضهم في الواقع يجرح الناس ويؤذي مشاعرهم لدرجة إننا شفنا ناس مش راضية تسلم على المطرب لإصابته بهذا المرض الجلدي ، ومش عارفين ردود فعل ذلك على نفسيته وصحته ، فهناك كلمات تجرح وتميت أكثر من الرصاص وتبقى مخزونة في نفسية البشر حتى يوم مماته لا يُمكن أن تمحى ، وليه مجتمعاتنا مريضة بالتنمر والقيل والقال على من أحبهم الله فأبتلاهم ، وليه الناس متخليهاش في نفسها وتراعي مشاعر الآخرين ، فالتنمر اللفظي والمعنوي مرض وسلاح قاتل في مجنتمعاتنا وممكن يكون الإنسان قابل وفرحان بأي إبتلاء له من ربنا لإختباره ولكن ما يضايقه كلام الناس ، وليه اللي بيتكلموا على الفاضية والمليانة ويتدخلوا في حياة وخصوصيات وجرح مشاعر الناس ميعرفوش انهم ممكن هم أو أي حد من أههم يتعرض لهذه الإبتلاءات وربما اكتر منها ، ليه نجرح فلان أو فلانه بكلمات قاتلة انتي متجوزتيش ليه ؟ وانتي ليه تخينة وانت تخين ليه كدة ؟ وعايزين نفرح بيكي أو نفرح بيها وغيره وغيره من الكلام اللي بيعتبر كلام زي السيف يجرح ويؤذي ويدمر نفسيات البشر ، لماذا لا نتعلم الرحمة والإنسانية وكل واحد يخليه في حاله وملهوش دعوة بالتدخل في خصوصيات غيره ، أين الدين في معاملاتنا ونحن أكبرشعب متدين وبيتكلم عن الفضيلة ولكن الواقع بيعري كتير مننا وبيبين أن تدينه أبعد ما يكون عن التدين السليم ، يا ريت نرجع لإنسانيتنا ونكون رحماء ببعضنا ، وأقول للمطرب رامي جمال : يا رامي لا تحزن من كلام الناس وكن قوي وصلب وواصل نجاحك ، فالبهاق الجسدي اللي يخف منك بإذن الله أهون بكثير من أمراض كتير ضربت مجتمعنا كالرياء والتكبر والسخرية من إبتلاءات البشر.